O Concello de Monforte mobiliza 63.100 euros en axudas a 14 entidades deportivas, culturais e sociais
O Concello de Monforte concedeu un total de 63.100 euros en subvencións a 14 entidades deportivas, culturais e sociais da cidade para contribuír ao desenvolvemento das súas actividades durante este ano. A concesión das axudas foi aprobada este luns, 21 de setembro, pola Xunta de Goberno local.
O alcalde, José Tomé Roca, destacou o papel das asociacións, clubs e colectivos beneficiarios e sinalou que estas subvencións forman parte da colaboración que mantén o Concello co tecido asociativo local. Segundo indicou, as entidades desenvolven ao longo do ano iniciativas que contribúen á participación cidadá e á oferta de actividades deportivas, culturais e sociais.
As cantidades concedidas oscilan entre os 500 e os 20.000 euros. O Club Lemos recibe a maior contía, con 20.000 euros, seguido do Club Natación Monforte, con 10.000 euros, e do Club Quixós, que contará con 6.000 euros.
A relación de entidades beneficiarias complétase con Fancine de Lemos, que recibe 5.000 euros; Clarisas Centro Purísima Concepción, Náufragos do Paradiso e Asociación Festival Carude Rock, con 4.000 euros cada unha; e Asociación de Empresarios de Hostalería de Lugo, con 3.000 euros.
Cruz Vermella contará con 2.000 euros, mentres que Sociedade Val de Lemos Caza y Pesca recibirá 1.500 euros e Club Pesca Monforte, 1.100 euros. Pola súa banda, Club Fluvial e A.D. Escolapios obterán 1.000 euros cada un, e Club de Tiro Olímpico Cabe contará con 500 euros.
José Tomé puxo tamén en valor que estas achegas permiten ás entidades desenvolver os seus programas e actividades con maiores garantías, especialmente nos ámbitos do deporte, a cultura e a atención e integración social. O rexedor asegurou que o Concello continuará colaborando co tecido asociativo local e apoiando as iniciativas promovidas por estes colectivos.