O PP de Monforte presenta alegacións á nova ponte do Malecón e pide paralizar o proxecto
O Grupo Municipal do PP de Monforte presentou alegacións ao proxecto de construción do novo ponte metálico e das conexións coas rúas Corredoira, Santa Clara e Paseo do Malecón, ao tempo que solicita a paralización da súa execución.
A portavoz municipal do PP, Katy Varela, explicou que a formación decidiu presentar estas alegacións aínda que o proxecto debe pasar pola aprobación do Pleno e posteriormente polo proceso de contratación. Segundo os populares, o expediente debería achegar máis información para xustificar a necesidade da infraestrutura e determinar se a solución proxectada responde ás necesidades de mobilidade do municipio.
Un dos aspectos cuestionados polo PP é precisamente a xustificación da alternativa escollida. O proxecto contempla a conexión viaria entre as dúas marxes do río Cabe, a redución do tráfico rodado no Ponte Medieval e un novo itinerario cara ao Hospital Comarcal e ao Centro de Saúde, ademais dunha diminución do tráfico na rúa Huertas, segundo a documentación citada pola formación.
Os populares consideran que a información sometida a exposición pública debería permitir coñecer con maior detalle que problema de mobilidade se pretende solucionar, a intensidade do tráfico existente e a análise realizada para determinar que a proposta actual é a alternativa adecuada.
Outra das alegacións céntrase no impacto sobre o contorno do Malecón e o conxunto histórico. O PP sinala que existe un informe favorable da Dirección Xeral de Patrimonio relativo ao paso do Camiño de Santiago, pero considera necesario analizar tamén o efecto global da infraestrutura sobre o ámbito patrimonial e a súa compatibilidade co PEPCHA.
A formación reclama igualmente unha maior xustificación da proporcionalidade económica da actuación. Segundo os populares, o expediente debería explicar non só o orzamento de execución, senón tamén a eficiencia da solución adoptada en relación co investimento público. O PP sitúa o custo do proxecto por riba dos cinco millóns de euros, de acordo coa documentación e a información pública difundida nos últimos meses.
As alegacións tamén abordan o impacto ambiental e a incidencia da actuación sobre a infraestrutura verde e a función do Paseo do Malecón como espazo de regulación climática urbana. Neste punto, Katy Varela defende que a análise non debería limitarse á posible retirada de árbores, senón ter en conta tamén os efectos da construción da ponte e das conexións sobre o solo e a vexetación existente.
“Nun contexto no que os instrumentos de planificación urbana tenden a potenciar espazos verdes e solucións vinculadas á adaptación climática, debe analizarse especialmente a afección que unha nova infraestrutura pode producir sobre un espazo como o Paseo do Malecón”, sinalou.
O PP cuestiona ademais o acceso ao expediente completo. Segundo a formación, poderían terse vulnerado os artigos 83 e 53 da Lei 39/2015, do Procedemento Administrativo Común das Administracións Públicas, ao considerar que non se tería posto á disposición a totalidade da documentación relacionada co proxecto, incluídos determinados informes internos municipais e informes sectoriais.
As restantes alegacións presentadas polos concelleiros populares refírense aos informes municipais que, ao seu xuízo, poderían ser susceptibles de anulación, ao posible incumprimento non xustificado das condicións de accesibilidade e ás diferenzas entre o proxecto actual e a proposta gañadora do concurso de ideas celebrado en 2020, entre outras cuestións.
“O que estamos reclamando é que un proxecto destas características estea perfectamente xustificado desde o punto de vista da mobilidade, do impacto sobre o contorno, da eficiencia económica, da accesibilidade e da propia tramitación administrativa”, afirmou Katy Varela. A portavoz popular engadiu que “non estamos falando só dunha infraestrutura viaria, senón dunha actuación que afecta directamente a un dos espazos máis relevantes de Monforte e que supón un investimento económico moi importante”.
Finalmente, a portavoz do PP sinalou que, segundo a súa formación, o expediente podería ser susceptible de nulidade ou anulabilidade e, por este motivo, solicita a paralización definitiva da execución do proxecto.