Montederramo abre o prazo para solicitar axudas de ata 70 euros por alumno para a compra de material escolar do curso 2026-2027
O Concello de Montederramo aprobou as bases reguladoras e a convocatoria de 2026 das axudas destinadas á adquisición de material escolar. A resolución adoptouse mediante decreto da Alcaldía con data do 16 de setembro de 2026, e o seu extracto publícase conforme ao previsto na Lei 38/2003, do 17 de novembro, xeral de subvencións.
A quen van dirixidas
As axudas están pensadas para as familias do alumnado matriculado no curso 2026-2027 en centros docentes de Educación Infantil, Educación Primaria e Educación Secundaria Obrigatoria (ESO) que residan no municipio.
Poderán solicitalas os proxenitores ou as persoas que exerzan a titoría ou custodia legal dos menores, sempre que cumpran estes requisitos:
- Que polo menos un dos proxenitores ou titores estea empadroado en Montederramo, no mesmo domicilio que o alumno ou alumna, na data de publicación das bases.
- Que o alumno ou alumna para quen se pide a axuda estea tamén empadroado no municipio e no mesmo domicilio que a persoa solicitante nesa mesma data.
- Que a persoa solicitante estea ao corrente das súas obrigas tributarias coa Axencia Tributaria estatal e autonómica, coa Seguridade Social e co propio Concello.
Contía
A axuda consiste nunha cantidade fixa de ata un máximo de 70,00 euros por alumno ou alumna.
Que material se pode financiar
As bases inclúen un amplo listado de material subvencionable, entre o que figuran libros de texto, cadernos de traballo, de escritura e de debuxo, partituras, mapas, cartolinas, papel de cores, plastilina, folios, bolígrafos, lapis, rotuladores, pinturas, témperas, acuarelas, correctores, pegamentos, tesoiras infantís, compases, gomas de borrar, afialapis, cartafoles, arquivadores, regras, calculadoras básicas, dicionarios, estoxos e mochilas, así como outros elementos que teñan a consideración de material escolar.
Quedan excluídos uniformes, material e roupa deportiva, grampadoras, material electrónico de calquera tipo (computadores, memorias USB, cartuchos de tinta e tóner, impresoras, libros electrónicos, plataformas dixitais ou outros dispositivos informáticos), así como outros artigos como dymos ou trades.
Prazo e forma de presentación
O prazo para presentar as solicitudes será dun mes, contado desde o día seguinte á publicación do anuncio do extracto das bases no Boletín Oficial da Provincia de Ourense.
As solicitudes poderán presentarse de forma presencial no Rexistro Xeral do Concello, empregando o modelo do anexo I das bases, ou por vía electrónica a través da sede electrónica municipal (montederramo.sedelectronica.gal). Tamén é posible empregar calquera dos medios previstos no artigo 16.4 da Lei 39/2015, do 1 de outubro, do procedemento administrativo común das administracións públicas. Nese caso, o mesmo día da presentación deberá enviarse o xustificante ao correo electrónico concello.montederramo@eidolocal.es.
Documentación necesaria
Xunto coa solicitude, asinada polo proxenitor ou a persoa que ostente a titoría ou custodia do alumno, deberá achegarse:
- Copia do DNI da persoa solicitante, dos proxenitores ou, se é o caso, do solicitante.
- Copia do libro de familia ou documento equivalente.
- Certificación do centro escolar ou acreditación da matrícula no curso 2026-2027.
- Certificado de titularidade bancaria da persoa solicitante.
- En caso de divorcio ou separación, copia do convenio regulador ou da sentenza xudicial, ou documento equivalente que acredite a custodia do menor.
As familias con varios fillos deberán presentar unha única solicitude. Ademais, a presentación da solicitude supón a aceptación incondicional das bases por parte de quen a formula.