Mofa & Befa leva ‘Os dous de sempre’, a súa adaptación de Castelao, ao Edificio Multiusos de Monforte de Lemos
A programación teatral de outono en Monforte de Lemos suma esta semana unha nova cita. Este xoves, 5 de novembro, ás 20.15 horas, o Edificio Multiusos acollerá ‘Os dous de sempre’, posta en escena a cargo do dúo cómico Mofa & Befa, integrado por Evaristo Calvo e Víctor Mosqueira, con dirección de Quico Cadaval.
Trátase dunha adaptación teatral dunha das obras máis recoñecidas da literatura galega, asinada orixinalmente por Castelao. O texto escénico foi escrito polo propio Quico Cadaval xunto con Carme Varela. Completan a ficha artística Baltasar Patiño, responsable da escenografía e do deseño de iluminación; Carlos Alonso, encargado do vestiario; e Bernardo Martínez, autor da música e do deseño de son. Sobre o escenario, ademais de Calvo e Mosqueira, estará tamén Josito Porto.
A proposta dálle nova vida a Pedriño e Rañolas, os dous personaxes que Castelao ideou na súa faceta de humorista gráfico. Amigos inseparables pero de carácter oposto —un soñador e idealista, o outro materialista e conformista—, ambos protagonizan esta versión pensada para público adulto, a partir de 13 anos.
As entradas teñen un prezo xeral de 5 euros, cunha tarifa reducida de 3 euros para estudantes, persoas desempregadas e xubiladas.
Esta representación forma parte da programación cultural que impulsa o Concello de Monforte a través da Rede Galega de Teatros e Auditorios de AGADIC, da que o municipio forma parte, e dos Circuítos de Teatro Profesional e Afeccionado da Deputación de Lugo. Grazas a esta colaboración, o último trimestre do ano reúne un total de 12 espectáculos teatrais entre outubro e decembro, combinando propostas de compañías profesionais con grupos de teatro afeccionado, tanto no Edificio Multiusos como na Casa da Cultura.
Entre as próximas citas figuran ‘A Rateira’, do grupo Argalleiras Teatro, o 6 de novembro na Casa da Cultura con entrada gratuíta; ‘A Metamorfoso’, de Sarabela Teatro, o 12 de novembro no Multiusos; e ‘Vermello’, de Rebuldeira Teatro-Sarria, que se representará dúas veces, o 14 de novembro na Casa da Cultura con entrada gratuíta e o 3 de decembro no Multiusos dentro do circuíto profesional. A programación continuará con ‘A cámara escura’, de Vórtice Escénico, o 26 de novembro; ‘A Revolución, 1789... ou por aí’, de Teatreiras Monforte, o 28 de novembro; ‘#Influencers’, de Negro López, o 1 de decembro; e ‘Hotel Esperanza’, do Grupo de Teatro Viraventos de Monforte, o 5 de decembro.