Cultura

A Casa da Cultura acolle este venres unha nova función teatral gratuíta, dentro da programación cultural prevista para o último trimestre do ano

A Casa da Cultura de Monforte de Lemos acollerá este venres, 6 de novembro, unha nova representación teatral dentro da programación cultural que o Concello organizou para o derradeiro tramo do ano. Nesta ocasión será o grupo Argalleiras Teatro, procedente de Chantada, o encargado de subir ao escenario, coa estrea da obra ‘A Rateira’.

Trátase dunha adaptación da coñecida peza ‘A Rateira’, cuxa coordinación e dirección corre a cargo de Paqui Abeledo. A función está pensada para todos os públicos e a entrada será libre e gratuíta.

A obra narra a historia das curmás Isa e María Lombardero, que volven a Navia de Suarna tras herdar do avó a Casa Benedicto. Ambas deciden converter a vivenda nun aloxamento turístico e comezan a recibir hóspedes do máis variado. Todo transcorre con aparente normalidade, malia unha forte nevarada, ata que un feito inesperado altera por completo a convivencia dentro do hotel.

O elenco está formado por Ánxeles V. Noguerol, Sabela Díaz, Teté González, Esther Rodríguez, Ana M. Bermúdez, María J. Rodríguez, Mila R. De Arriba, Aleli Taboada, Lucas Regal, Mariona Rodríguez e Ana López.

Esta cita enmárcase na programación cultural que impulsa o Concello de Monforte a través da Rede Galega de Teatros e Auditorios de AGADIC e dos Circuítos de Teatro Profesional e Afeccionado da Deputación de Lugo, unha iniciativa coa que se ofrece á cidadanía unha ampla variedade de propostas escénicas ao longo dos derradeiros meses do ano. En total, o programa cultural previsto entre outubro e decembro contempla doce espectáculos teatrais, combinando compañías profesionais con grupos de teatro afeccionado.

Entre as próximas citas co teatro en Monforte figura, un día antes, a actuación de Mofa e Befa con ‘Os dous de sempre’, o xoves 5 de novembro ás 20.15 horas no Edificio Multiusos, con entradas a 5 euros (3 euros para estudantes, desempregados e xubilados) e recomendada para maiores de 13 anos.

A programación continuará o xoves 12 de novembro con ‘A Metamorfose’, de Sarabela Teatro, tamén no Edificio Multiusos e ás 20.15 horas, co mesmo prezo de entrada e recomendada para maiores de 12 anos. O sábado 14 de novembro chegará a quenda de ‘Vermello’, de Rebuldeira Teatro-Sarria, na Casa da Cultura, con entrada gratuíta.

Xa na recta final de novembro, o día 26, ás 20.15 horas no Edificio Multiusos, representarase ‘A cámara escura’, de Vórtice Escénico, con entradas a 5 euros (3 euros para estudantes, desempregados e xubilados) e recomendada para maiores de 12 anos. O sábado 28 de novembro, na Casa da Cultura, será a quenda de ‘A Revolución, 1789... ou por aí’, de Teatreiras Monforte, con entrada gratuíta para todos os públicos.

O ciclo continuará en decembro con ‘Influencers’, de Negro López, o martes 1 de decembro ás 20.15 horas no Edificio Multiusos, con entrada a 5 euros (3 euros para estudantes, desempregados e xubilados) e recomendada para maiores de 13 anos. O xoves 3 de decembro chegará ‘Alicia Wants To’, de Bengala, con entrada gratuíta e recomendada para maiores de 12 anos. A programación teatral do trimestre pechará o sábado 5 de decembro con ‘Hotel Esperanza’, a cargo do Grupo de Teatro Viraventos de Monforte, con entrada gratuíta para todos os públicos.