Un incendio obriga a desaloxar unha residencia de maiores en Monforte de Lemos
Unha residencia de maiores de Monforte de Lemos tivo que ser desaloxada por completo esta mañá de martes despois de declararse un incendio nunha das súas habitacións. O centro, xestionado pola empresa DomusVi e situado na rúa Morín, no barrio de Ribas Altas, rexistrou o aviso pouco despois das oito da mañá.
Segundo a información facilitada polo 112 Galicia, foi un traballador do propio centro quen deu a voz de alarma ao detectar que saía fume dunha estancia situada na primeira planta. O persoal xa conseguira sacar os ocupantes da habitación antes da chegada dos servizos de emerxencia, aínda que varias das persoas afectadas precisaron despois asistencia sanitaria.
Os bombeiros de Monforte desprazáronse ata o lugar e conseguiron extinguir as chamas rapidamente, evitando que o lume se estendese a outras dependencias. Unha vez controlado o incendio, os efectivos procederon a ventilar o edificio para eliminar o fume acumulado, mentres o resto de residentes tivo que permanecer fóra das súas habitacións durante as labores de extinción.
No dispositivo de emerxencia traballaron tamén profesionais de Urxencias Sanitarias de Galicia-061, así como axentes da Policía Nacional e da Policía Local, que colaboraron nas tarefas de desaloxo e control da zona.
En canto ao número de afectados, o primeiro balance trasladado polo 112 Galicia falaba de cinco persoas trasladadas ao Hospital de Monforte, unha delas con queimaduras e as catro restantes por inhalación de fume. Horas máis tarde, fontes da propia DomusVi elevaron a cifra a sete persoas trasladadas —tres residentes e catro profesionais do centro—.
Unha vez rematada a intervención, axentes policiais entraron na habitación afectada para inspeccionar os danos e recoller indicios que permitan determinar a orixe do lume, cuxas causas seguen baixo investigación.
Desde DomusVi asegurouse que os sistemas de seguridade e os protocolos internos do centro "se activaron correctamente" e que a residencia mantén a súa actividade con normalidade tras controlarse o incidente. A empresa engadiu que segue de preto a situación e que está colaborando cos servizos de emerxencia e as autoridades.
O suceso prodúcese poucos días despois de que a propia residencia confirmase a detección dun foco de sarna entre os seus usuarios, polo que xa se activara un protocolo específico. Trátase, non obstante, de dous incidentes distintos e sen relación confirmada entre si.