Triacastela reivindica o seu potencial gastronómico coa guía “Saborea o Camiño Francés”
A Mancomunidade de Municipios do Camiño Francés vén de presentar a guía “Saborea o Camiño Francés”, unha publicación na que se pon en valor a riqueza gastronómica dos diferentes puntos desta ruta xacobea. No caso de Triacastela, o protagonismo recae especialmente no mel e na tradición culinaria ligada ao seu entorno de montaña.
O mel producido neste municipio lugués destaca pola súa pureza e polo seu sabor equilibrado, froito dun proceso de extracción tradicional desenvolvido nunha paisaxe marcada polos bosques, os prados e a abundancia de flores silvestres. Trátase dun produto que reflicte fielmente a esencia natural da zona e o coidado dunha actividade que se mantén viva co paso do tempo.
A apicultura en Triacastela conta cunha fonda raíz histórica, ligada a prácticas ancestrais nas que as colmeas se protexían en enclaves coñecidos como alvarizas. Desde a Praza do Concello parte unha ruta sinalizada que permite achegarse a unha destas construcións tradicionais, hoxe rehabilitada e convertida en anfiteatro, converténdose nun punto de interese cultural e turístico.
A oferta gastronómica complétase cunha cociña de interior marcada pola estacionalidade e polos produtos da contorna. As carnes teñen un papel destacado, especialmente a tenreira galega e o porco celta, acompañadas de alimentos como as castañas, as noces e diversas verduras que reforzan a identidade culinaria do municipio.