Taboada corta o tráfico na LU-P-6001 por obras de rexeneración do firme ata o venres
O Concello de Taboada informou do inicio das obras de rexeneración do firme na estrada LU-P-6001, no tramo que une as localidades de Taboada e Taboada dos Freires.
Dende o consistorio piden aos veciños que non aparquen os seus vehículos en ningunha das marxes do tramo urbano desta vía —correspondente á Rúa Aviación Española— dende primeira hora da mañá, co obxectivo de que os traballos poidan desenvolverse sen contratempos.
Así mesmo, o Concello recomenda ás persoas que utilizan habitualmente esta estrada que busquen vías alternativas durante estes días, xa que a actuación provocará cortes de tráfico na zona mentres duren as obras.
Segundo as previsións municipais, os traballos de rexeneración do firme quedarán rematados o próximo venres, día 23 de outubro.
Dende a Alcaldía e a área de Obras do Concello de Taboada trasladaron o seu agradecemento á cidadanía pola comprensión, ademais de pedir desculpas polas molestias que esta actuación poida ocasionar durante a súa execución.