Sober ultima as Festas do Carme con música, actividades para nenos e a tradicional paellada xigante
Sober prepárase para vivir as súas Festas do Carme, que terán lugar entre o 18 e o 21 de setembro. O concello lucense contará cun cartel de actuacións musicais no que destacan a Orquestra Panorama City, Óscar Ibáñez, o camión escenario La Gramola Tour Truck, a orquestra Alma Latina e a Banda de Música de Sober, entre outras propostas que animarán as xornadas festivas.
Aínda que o elenco de artistas xa está confirmado, o programa completo e definitivo das festas darase a coñecer nos vindeiros días. Alén das citas musicais, a programación combinará actividades pensadas para todos os públicos, con propostas infantís, actos relixiosos propios das festas patronais e actividades deportivas.
O remate chegará o día 21 de setembro, xornada declarada festivo local en Sober. Como manda a tradición, a localidade acollerá a paellada xigante, unha comida popular e gratuíta que reúne cada ano a veciños e visitantes. Un ano máis será o cociñeiro Pepe Arias quen se encargue de elaborar este prato multitudinario, xa convertido nunha das citas máis agardadas das festas.