San Xoán de Río pide non consumir a auga da billa tras detectar valores inadecuados nas últimas analíticas
O Concello de San Xoán de Río pide aos veciños abastecidos pola traída municipal que non empreguen a auga da billa nin para beber nin para cociñar. A medida chega despois de que as últimas analíticas realizadas sobre a auga de abastecemento revelasen valores que non se axustan aos parámetros adecuados.
Segundo explica o propio Concello, esta recomendación adóptase seguindo as indicacións trasladadas pola Consellería de Sanidade, unha vez detectadas esas irregularidades nos controis practicados sobre a calidade da auga.
Dende o consistorio precisan que a restrición afecta exclusivamente aos usuarios conectados á rede de abastecemento municipal, e que o seu uso queda desaconsellado para fins alimentarios e de consumo humano en xeral, ata que se confirme a recuperación dos niveis normais.
O Concello sinalou que xa está a traballar nos controis e nas melloras necesarias para solucionar a incidencia canto antes e devolver a auga ás súas condicións habituais.
Mentres dura esta situación, o Concello anunciou que porá á disposición dos veciños auga embotellada, que se repartirá entre quen a necesite para o seu consumo diario. Como alternativa, os afectados tamén poderán achegarse ao establecemento Ultramarinos da localidade para abastecerse de auga destinada ao uso habitual.
O Concello non concretou polo momento un prazo estimado para o restablecemento completo do servizo, aínda que insistiu en que se está a actuar coa maior celeridade posible para normalizar a situación.