Concello

Os traballos inclúen o pintado de aulas afectadas por humidades e a renovación da entrada do centro, dentro dun programa formativo no que participan 20 alumnos e alumnas

Esta semana iniciáronse os traballos de mellora no CEIP de San Clodio, unha actuación que respondía a unha demanda formulada desde hai tempo polo Consello Escolar e pola comunidade educativa do centro.

As obras están a ser executadas polo Obradoiro de Emprego compartido dos concellos de Folgoso do Courel, Quiroga e Ribas de Sil. Entre as actuacións previstas figura o pintado das aulas que presentaban problemas de humidades e desconchados, así como a renovación da pintura da entrada principal do colexio, co obxectivo de mellorar o estado das instalacións e ofrecer un espazo máis agradable para alumnado e profesorado.

O Obradoiro de Emprego celebra este ano a súa 12ª edición, consolidándose como un dos programas de formación e emprego con maior continuidade da comarca. A coordinación do proxecto rota entre os tres concellos participantes e, neste 2026, corresponde ao Concello de Folgoso do Courel.

Nesta edición forman parte do programa 20 alumnos e alumnas, acompañados por tres monitores, unha persoa administrativa e un director. O equipo distribúese en tres brigadas que desenvolven actuacións nos tres municipios participantes.

Ademais da formación teórica e práctica que reciben para mellorar as súas posibilidades de inserción laboral, os participantes realizan traballos de servizo público orientados á conservación e mellora de instalacións e espazos municipais da comarca.