Ribas de Sil amplía os contidos do Centro de Interpretación do Río Sil con novos paneis e pantallas interactivas
O Centro de Interpretación do Río Sil (CIRS), situado na Escola de Torbeo, incorporou novos contidos co obxectivo de continuar mellorando este espazo dedicado á divulgación e posta en valor do patrimonio natural, xeolóxico e cultural de Ribas de Sil.
A actuación permitiu instalar seis novos paneis divulgativos centrados en diferentes aspectos do territorio. Entre eles atópanse o Xeoparque Montañas do Courel, a historia da Escola de Torbeo, a xeoloxía de Torbeo e o Ollo de Sapo, os ríos do Xeoparque, a idade do río Sil e algunhas singularidades arquitectónicas, como A Pedra Cavaleira.
Ademais, o centro conta agora con dúas novas pantallas interactivas. Unha delas permite visualizar un vídeo sobre o río Sil ao seu paso polo Xeoparque, mentres que a segunda ofrece unha animación en 3D que explica o funcionamento dun muíño tradicional, tomando como referencia o muíño de Vieiros.
A ampliación de contidos supuxo un investimento total de 14.996,74 euros, financiado nun 90 % polo GDR Ribeira Sacra-Courel, a través do programa LEADER e con fondos europeos.
Con esta actuación, o Concello de Ribas de Sil continúa reforzando o Centro de Interpretación do Río Sil como espazo para coñecer e divulgar os valores naturais, xeolóxicos, históricos e culturais vinculados ao territorio.