Quiroga e Ribas de Sil adiantan a recollida da oliva pola falta de chuvia
Os olivais situados entre Quiroga e Ribas de Sil, no sur da provincia de Lugo, viven este ano unha campaña de recolleita distinta á habitual. O que normalmente arrinca a finais de outubro púxose en marcha con varios días de adianto, e dende hai aproximadamente unha semana os produtores da zona xa están en pleno traballo de recollida.
Detrás deste adianto atópase unha combinación de factores meteorolóxicos que se vén arrastrando dende hai meses: unha calor por riba do habitual durante toda a primavera e o verán, que se mantivo tamén ao inicio do outono. Estas condicións aceleraron os procesos naturais de madureza das olivas, facendo que o froito acade antes o punto óptimo para a súa recollida.
A cor, principal indicador
Nos olivais da comarca, o estado das olivas identifícase fundamentalmente pola súa tonalidade. As variedades propias da zona son, de momento, as que mostran un maior grao de madureza, cunha cor escura que indica que xa están listas para ser recollidas. O resto das variedades presentes nos olivais tamén comezou a cambiar de cor, aínda que de xeito máis gradual.
Este comportamento explica por que os traballos de recolleita comezaron primeiro polas castas autóctonas do val, denominadas mansa e brava, antes de se estender nas vindeiras semanas a outras variedades cultivadas na zona do Sil, entre elas a arbequina e a picual.
En canto á calidade do froito, a escaseza de precipitacións favoreceu que as olivas cheguen á recolleita en bo estado sanitario e cun nivel de madureza axeitado. Porén, esta mesma seca está a ter un efecto negativo sobre a cantidade de aceite que se extrae de cada remesa recollida, con rendementos por debaixo do que sería habitual nunha campaña normal. Con todo, agárdase que esta proporción mellore de forma paulatina a medida que avance a tempada.
A situación dos olivais non é un feito puntual, senón que se enmarca dentro dunha tendencia máis ampla que xa se notara noutros cultivos da comarca. De feito, as mesmas condicións de calor e falta de auga provocaron semanas atrás que a vendima tamén se adiantase en varias zonas da Ribeira Sacra, denominación de orixe que engloba tanto a Quiroga coma a Ribas de Sil, o que pon de manifesto ata que punto as condicións climáticas deste ano están a alterar os calendarios agrícolas tradicionais da zona.