Parada de Sil dá luz verde definitiva ás axudas para rehabilitar vivendas destinadas ao alugueiro
O Concello de Parada de Sil deu o seu visto e prace definitivo a unha nova ordenanza municipal pensada para impulsar a rehabilitación de vivendas e poñelas despois no mercado do alugueiro. A norma, que recibira a súa aprobación inicial no pleno ordinario celebrado o 31 de xullo de 2025, superou despois o trámite de exposición pública sen que se presentasen alegacións nin reclamacións, polo que o texto quedou aprobado con carácter definitivo.
O obxectivo declarado polo Concello é dobre: por unha banda, recuperar vivendas que actualmente están en desuso ou en mal estado, e pola outra, frear a perda de poboación facilitando que novas familias poidan instalarse no municipio grazas a prezos de alugueiro máis accesibles.
Que obras se poden financiar
A ordenanza contempla axudas para intervencións variadas dentro das vivendas situadas no termo municipal. Entre elas figuran a reforma de baños e cociñas, a instalación ou mellora de sistemas de calefacción, actuacións para mellorar a accesibilidade —como a adaptación de baños ou portas— e melloras relacionadas coa eficiencia enerxética, como o illamento térmico, o cambio de fiestras ou a instalación de iluminación LED. Tamén se inclúe calquera outro traballo menor que resulte necesario para que a vivenda gañe en habitabilidade.
Quen pode solicitalas
Poderán optar a estas subvencións tanto persoas físicas como xurídicas que sexan propietarias de vivendas en Parada de Sil, sempre que estean ao corrente das súas obrigas tributarias coas administracións estatal, autonómica e local, así como coa Seguridade Social. Un requisito clave é que a vivenda non pode estar alugada no momento de presentar a solicitude, e o propietario deberá comprometerse por escrito a destinala a alugueiro habitual e permanente durante un mínimo de tres anos.
Contía da axuda
A subvención poderá cubrir ata o 80 % do orzamento da obra, cun tope de 3.000 euros por vivenda. Será o propio Concello quen fixe cada ano a partida orzamentaria destinada a este fin, de xeito que o número de vivendas beneficiarias dependerá do crédito dispoñible en cada convocatoria. Eso si, non se financiarán obras que xa estivesen rematadas antes de presentar a solicitude.
Como se concederán
As axudas repartiranse mediante un sistema de concorrencia competitiva, é dicir, as solicitudes valoraranse e compararanse entre si en función de criterios como o impacto social da actuación, a eficiencia enerxética que se consiga, ou a antigüidade da vivenda. Será cada convocatoria anual a que determine os prazos concretos, a documentación necesaria —entre outras, referencia catastral, orzamentos da obra, fotografías do estado actual e o compromiso de alugueiro— e os criterios exactos de valoración.
Compromisos para os propietarios
Quen reciba a axuda deberá executar as obras nun prazo máximo de doce meses e alugar a vivenda dentro dos seis meses seguintes á finalización dos traballos. Ademais, terá que mantela en réxime de alugueiro habitual durante tres anos desde que rematen as obras e comunicar ao Concello calquera cambio que se produza. O incumprimento destas condicións poderá supoñer a retirada da axuda e a apertura dun expediente para recuperar, total ou parcialmente, o diñeiro concedido.
Estas subvencións, ademais, son compatibles con outras axudas públicas ou privadas que poidan solicitarse para a mesma finalidade, sempre que a suma de todas elas non supere o custo total da rehabilitación.
A nova ordenanza entrará en vigor ao día seguinte da súa publicación íntegra, e servirá de marco para as futuras convocatorias anuais que o Concello vaia aprobando.