Os participantes do Obradoiro de Emprego da Pobra do Brollón acondicionan os camiños do Trail Capela San Vitoiro
O alumnado do Obradoiro de Emprego realizou nos últimos días traballos de roza e limpeza vexetal nos camiños polos que discorrerá o Trail Capela San Vitoiro, contribuíndo así á mellora e acondicionamento do percorrido.
As actuacións forman parte dos labores de limpeza de faixas secundarias para a prevención de incendios forestais que desenvolve o alumnado do Obradoiro de Emprego. Os traballos permiten manter despexados os camiños e poñer en valor, ao mesmo tempo, a paisaxe pola que transcorre a proba deportiva.
Coincidindo con estes traballos, a organización lembra que o prazo de inscrición para participar no Trail Capela San Vitoiro e na súa andaina permanecerá aberto ata o próximo 1 de setembro.
Deste xeito, as persoas interesadas en participar aínda dispoñen de prazo para formalizar a súa inscrición e percorrer un trazado que combina deporte e natureza.