O Festival Danza no Camiño chega este domingo a Ferreira de Pantón dentro das XXXVII Xornadas da Ruta do Románico
O Festival Danza no Camiño fará parada este domingo, 12 de xullo, en Ferreira de Pantón, onde ofrecerá un espectáculo incluído na programación das XXXVII Xornadas da Ruta do Románico de Pantón.
A actuación desenvolverase ás 20.30 horas na Igrexa de Santiago de Castillón, un dos escenarios escollidos para esta iniciativa cultural que combina danza, música e patrimonio histórico.
Danza no Camiño é un proxecto coreográfico que propón unha mirada ao patrimonio cultural a través das artes escénicas, tomando como principal fonte de inspiración o Camiño de Santiago ao seu paso por Galicia. A proposta reúne diferentes intérpretes e composicións musicais para ofrecer unha experiencia na que a creación artística dialoga co valor histórico e arquitectónico dos espazos que acollen cada representación.
O programa é a extensión en Galicia da iniciativa Danza en el Camino, que se desenvolve en Castela e León desde o ano 2019, adaptando o formato ao patrimonio e ao percorrido xacobeo en territorio galego.