O Concello de Monforte licita por 281.000 euros as obras de mellora do pavimento en varios viais de Piñeira
O Concello de Monforte vén de licitar de dous novos proxectos de mellora da pavimentación na parroquia de Piñeira, por un importe conxunto de 281.000 euros. As actuacións afectan á vía que conecta os núcleos de As Bodegas-A Regueira e ás vías entre O Bosque e a estrada do Reboredo.
Estas intervencións están incluídas no plan de investimentos en infraestruturas viarias presentado o pasado mes de maio, que contempla unha decena de actuacións en rúas do centro urbano e da zona rural, cun orzamento global de 1.059.733,23 euros.
A Xunta de Goberno Local deu luz verde á licitación destes dous proxectos na sesión do 1 de xuño. Segundo informou o Concello, os contratos xa están publicados na Plataforma de Contratación Pública e o prazo de presentación de ofertas finaliza o 29 de xuño. O prazo de execución previsto para ambas actuacións é dun mes.
O alcalde sinalou que este programa de obras “vai permitir seguir mellorando tanto as parroquias como rúas e barrios da cidade, reforzando a seguridade viaria e as comunicacións e, en definitiva, mellorando a calidade de vida da veciñanza”.
En canto ao primeiro proxecto, o vial entre As Bodegas e A Regueira, prevese a rexeneración do firme nun tramo de 780 metros de lonxitude, cunha superficie de actuación de 5.900 m². Os traballos inclúen o rebaixado do firme, achega de materiais como cachote e grava, colocación de base de zahorra, nova capa de aglomerado en quente, así como o pintado da sinalización viaria. O investimento ascende a 177.770,29 euros.
O segundo proxecto afecta ás vías entre O Bosque e a estrada do Reboredo, cunha lonxitude total de 1.670 metros e unha superficie de 6.960 m². As actuacións inclúen o rebaixado e recheo con zahorra, a renovación do firme con aglomerado en quente, o recalce de tapas de arquetas e a instalación dun redutor de velocidade. O orzamento é de 103.825,63 euros.
O plan de investimentos municipal completarase con novas actuacións previstas en vías como a rúa Pintor Luis Seoane, Marcelle e San Julián de Tor. O obxectivo do Goberno local é que todas as obras estean executadas a finais de 2026.