O Concello de Monforte entrega os diplomas aos participantes nos obradoiros de dixitalización nas parroquias
O alcalde de Monforte de Lemos, José Tomé, fixo entrega este xoves dos diplomas de participación aos máis de 80 veciños e veciñas que tomaron parte nos obradoiros gratuítos de dixitalización organizados polo Concello en colaboración coa Deputación de Lugo.
A formación desenvolveuse en diferentes xornadas entre novembro de 2025 e febreiro de 2026, con cursos de 20 horas presenciais impartidos nos locais sociais das parroquias de Ribasaltas, Sindrán, Gullade, Bascós, Piñeira, Distriz, Seoane e A Penela.
Estes obradoiros tiveron como obxectivo achegar habilidades tecnolóxicas básicas á poboación do rural, con contidos prácticos centrados no uso da firma dixital, o sistema Ch@ve 365, a aplicación do Sergas, a sede electrónica das administracións, así como o manexo do teléfono móbil e ferramentas de uso cotián como Bizum ou a banca electrónica.
A iniciativa enmárcase no programa ‘E para dixitalizarse Lugo’, impulsado pola Deputación de Lugo en colaboración cos concellos, ao que se sumou Monforte co fin de facilitar a inclusión dixital da veciñanza, especialmente no ámbito rural.
Durante o acto, o rexedor fixo entrega dos diplomas e dun agasallo ás persoas asistentes, ao tempo que as felicitou pola súa participación. José Tomé animou á veciñanza, especialmente ás persoas maiores, a “perderlle o medo ás tecnoloxías, aproveitar as vantaxes que ofrecen e facer un bo uso delas”.
O alcalde lembrou ademais que esta iniciativa xa se puxera en marcha cando el presidía a Deputación de Lugo, co obxectivo de achegar a formación dixital a toda a poboación e reducir a fenda tecnolóxica no medio rural.
Os cursos estiveron dirixidos principalmente a persoas maiores, desempregadas, mocidade e mulleres do rural, aínda que estiveron abertos a todos os colectivos. Ao remate da formación, as persoas participantes recibiron tamén un reloxo dixital e un bolígrafo como agasallo.