O Concello da Pobra de Trives renova o firme dunha rúa en Cova tras as queixas veciñais
O Concello da Pobra de Trives levou a cabo unha actuación de mellora na localidade de Cova, onde procedeu a reparar o pavimento dunha das súas rúas. A intervención responde a unha petición formulada polos propios veciños, que viñan denunciando o deficiente estado no que se atopaba o firme de formigón da vía.
Segundo informou o Concello, os traballos consistiron nunha reparación integral do pavimento, coa renovación completa da súa superficie. Con esta actuación búscase mellorar tanto as condicións de tránsito como a seguridade e a accesibilidade para quen circula pola zona, xa sexa a pé ou en vehículo.
Dende o Consistorio sinalaron que este tipo de intervencións se enmarcan nunha liña de traballo continuada orientada a atender as demandas dos veciños e a mellorar as infraestruturas das distintas aldeas do municipio. Neste sentido, subliñaron que todas as parroquias e núcleos rurais reciben atención por parte da administración local, con independencia do seu tamaño ou localización.