O centro sociocultural de Bóveda programa catro obras de teatro entre setembro e decembro
O Centro Sociocultural de Bóveda será escenario, entre os meses de setembro e decembro, da nova edición do ciclo Outono de Teatro 2026, un programa que reunirá a catro compañías galegas con propostas pensadas para públicos de idades moi diversas.
A primeira cita terá lugar o 22 de setembro, ás 11.00 horas, coa actuación de Alentía Teatro, compañía procedente de Palas de Rei, que representará a obra 'Tesouros de man aberta', pensada para gozar en familia e especialmente indicada para o público infantil.
O ciclo continuará o 25 de outubro, ás 18.00 horas, coa chegada do grupo A Mariña, de Cervo, que porá en escena 'A historia dun fidalgo para sempre lembrar', unha proposta aberta a todo tipo de espectadores.
Xa en novembro, concretamente o día 22 e a partir das 19.00 horas, será a quenda de Lume Escénico, compañía da Pontenova, que presentará 'Inquisítame outra vez', unha obra recomendada para maiores de 14 anos.
A programación pecharase o 26 de decembro, ás 17.00 horas, coa actuación de Loia Producións e a súa montaxe 'A boneca de trapo', pensada para o público infantil e coa que se poñerá punto final a esta edición do ciclo.
Todas as funcións desenvolveranse no Centro Sociocultural de Bóveda. A iniciativa está organizada polo Concello de Bóveda e conta coa colaboración da Vicepresidencia da Deputación de Lugo.