Deportes

A actividade, de carácter semanal, procura favorecer a forza, o equilibrio e a autonomía das persoas maiores, e será gratuíta para quen estea empadroado

O Concello da Pobra de Trives puxo en marcha un novo curso de ximnasia de mantemento dirixido ás persoas maiores do municipio, co obxectivo de ofrecerlles un espazo semanal onde exercitarse, relacionarse e coidar da súa saúde.

A iniciativa parte da idea de que cumprir anos non ten por que supoñer deixar de lado a actividade física, senón todo o contrario: seguir en movemento axuda a conservar a forza, a autonomía e a seguridade á hora de desenvolverse no día a día. Neste sentido, lémbrase a importancia de traballar a musculatura, xa que a súa falta de uso leva consigo perda de forza, equilibrio e mobilidade, o que pode repercutir en actividades tan cotiás como andar, subir escaleiras, ir facer a compra ou valerse por un mesmo.

O curso está dirixido a persoas a partir de 60 anos e terá unha frecuencia semanal, con grupos organizados tanto na localidade de Trives como nas distintas parroquias do municipio. A actividade será gratuíta para todas aquelas persoas que estean empadroadas.

Quen estea interesado en participar deberá facer a preinscrición nas oficinas do Concello.