Monforte recupera a cuberta do adro da igrexa de Baamorto cun investimento de 29.400 euros
A igrexa de Santa María de Baamorto, en Monforte de Lemos, estreou este domingo a reforma das cubertas do seu adro tras unha intervención que supuxo un investimento de 29.400 euros. O alcalde, José Tomé Roca, e o bispo de Lugo, Alfonso Carrasco Rouco, inauguraron os traballos coincidindo cunha misa celebrada ás 13.00 horas, que permitiu á veciñanza coñecer o resultado da actuación.
As obras forman parte do convenio de colaboración asinado o 9 de outubro de 2025 entre a Deputación de Lugo e a Diocese de Lugo para actuar en nove templos da provincia. Tres deles están situados no municipio de Monforte: Santa María de Baamorto, Santa María de Rozavales e Santa María da Penela. O investimento conxunto nestas tres igrexas alcanza os 112.700 euros, cofinanciados pola institución provincial e a Diocese.
En Baamorto, a intervención centrouse principalmente no soportal que rodea o templo polas fachadas oeste e sur. Retirouse a cobertura existente de tella cerámica curva para instalar un novo sistema con paneis de fibrocemento libres de amianto e enrastrelado, sobre o que se volveu colocar unha cuberta de tellas cerámicas curvas.
José Tomé destacou que a actuación forma parte dun compromiso máis amplo coa conservación do patrimonio das parroquias rurais. "Conservar as igrexas é tamén conservar a historia, a arquitectura e a vida social do noso territorio", sinalou, incidindo en que estes edificios funcionan tamén como lugares de encontro e de conservación das tradicións.
O rexedor lembrou ademais que o convenio foi asinado durante a súa etapa como presidente da Deputación e que a inclusión dos tres templos monfortinos respondeu a unha iniciativa súa. Pola súa banda, o bispo de Lugo agradeceu a colaboración para preservar o patrimonio relixioso no rural e favorecer a súa transmisión ás seguintes xeracións.
TRES TEMPLOS. Os traballos previstos no acordo avanzan tamén nas outras dúas igrexas de Monforte. En Santa María da Penela xa se executou unha actuación de 44.000 euros para renovar as tellas da cuberta, substituír elementos de madeira deteriorados no soportal e colocar canalóns e baixantes de zinc.
En Santa María de Rozavales, as obras están actualmente en marcha cun orzamento de 39.300 euros. Neste caso, a intervención contempla a renovación da cuberta, coa substitución completa da lousa e das táboas, ademais dos elementos de madeira en mal estado. Tamén se instalarán canalóns e baixantes de zinc e se repasarán os encontros do campanario coa fachada principal.
Santa María de Baamorto, situada no núcleo das Devesas, conserva restos románicos a pesar das reformas realizadas nos séculos XVII e XVIII. Entre os seus elementos máis destacados figuran as pinturas murais da fachada sur, o soportal que percorre dúas das súas fachadas e os seus retablos neoclásicos.