Monforte de Lemos abre o prazo de inscrición para o novo curso da Escola Municipal de Danza
O Concello de Monforte de Lemos abre o período de matrícula na Escola Municipal de Danza para o curso 2026-2027. Segundo trasladou o consistorio, as clases comezarán o vindeiro venres 16 de outubro, e terán como sede o Centro Cívico, situado no Paseo do Malecón.
Aquelas persoas interesadas en apuntarse a esta oferta formativa deberán presentar a súa solicitude ben de xeito presencial, a través da oficina de Rexistro municipal, ben a través da Sede Electrónica do Concello.
En canto ás disciplinas dispoñibles, a escola mantén tres especialidades diferenciadas por idades. O ballet clásico está dirixido a nenos e nenas a partir dos 5 anos, mentres que tanto a danza contemporánea coma o hip hop se ofrecen para alumnado a partir dos 10 anos.
Desde a organización do centro explican que a metodoloxía empregada nas clases segue un enfoque de carácter académico, apoiado no traballo de aspectos técnicos como a estabilidade corporal, a rotación, a liña ou a capacidade expresiva, entre outros elementos considerados esenciais para unha aprendizaxe axeitada. Así mesmo, sinálase que, cando as condicións e o interese do alumnado o permitan, a formación pode orientarse cara a unha vertente de carácter máis profesional dentro do ámbito da danza.