Monforte aproba inicialmente o proxecto da nova ponte de ferro do Malecón e sométeo a exposición pública
O Concello de Monforte de Lemos deu a coñecer a aprobación inicial, adoptada pola Xunta de Goberno Local, do proxecto para construír unha nova ponte de ferro na zona do Malecón. O acordo, alcanzado na sesión do luns 31 de agosto, presentouse publicamente este martes, 1 de setembro, e supón o inicio formal da tramitación administrativa dunha infraestrutura que o goberno local considera clave tanto para a mobilidade da cidade como para a futura conservación da Ponte Medieval.
O proxecto xa dispón dos informes favorables de Patrimonio da Xunta de Galicia e da Confederación Hidrográfica do Miño-Sil, o que permitiu avanzar na súa tramitación. A iniciativa ten a súa orixe nun concurso de ideas convocado polo consistorio en 2020, cuxo deseño gañador recupera a imaxe dunha antiga ponte de ferro que existiu na contorna da actual Ponte Nova da avenida de Galicia ata a súa desaparición na década de 1950.
A nova estrutura conectará as rúas Santa Clara e Corredoira co paseo do Malecón, mellorando a comunicación entre esa zona da cidade e a contorna hospitalaria, e contribuíndo a aliviar o tráfico rodado pola rúa Hortas e o centro urbano. O deseño formulouse sen apoios dentro da canle do río Cabe, para preservar tanto o curso fluvial como a contorna natural do Malecón. A plataforma terá 12 metros de ancho en total, repartidos en dous carrís de circulación de 3,5 metros e dúas beirarrúas de 2,5 metros cada unha. Segundo trasladou o goberno local, as obras non afectarán á zona verde nin ao arboredo de ribeira, salvo a un chopo e a unha rama dun plátano, polo que se manterán as condicións de sombra e os espazos de descanso existentes.
O orzamento de licitación ascende a 5.126.356,71 euros, financiados mediante un convenio coa Deputación de Lugo que cobre o 45 % do custo (2.287.057 euros), mentres que o 55 % restante (2.839.299,71 euros) corresponde ao Concello. Desde o goberno municipal apúntase ademais que unha eventual baixa na licitación podería reducir a achega municipal entre un 10 % e un 15 %, en función das ofertas presentadas.
O acordo de aprobación inicial publicouse este 1 de setembro no Boletín Oficial da Provincia, na Sede Electrónica e na páxina web municipal, abríndose un prazo de exposición pública dun mes, ata o 1 de outubro. A documentación pode consultarse na Secretaría do Concello, previa solicitude de cita, así como de forma telemática. Unha vez rematado este período, o procedemento continuará coa resolución das alegacións que se poidan presentar e coa aprobación definitiva do proxecto.
A folla de ruta prevista inclúe, tras a aprobación definitiva, a licitación das obras polo Pleno municipal, a súa adxudicación, a aprobación do documento de seguridade e saúde, a sinatura da acta de replanteo e o inicio dos traballos. Segundo as previsións municipais, a licitación podería producirse antes de que remate 2026, coa adxudicación arredor de abril de 2027 e o comezo das obras no verán dese mesmo ano, coincidindo cunha época axeitada para os movementos de terras.
Esta actuación enmárcase no obxectivo municipal de liberar de tráfico rodado a Ponte Medieval, catalogada como Ben de Interese Cultural, para convertela nun espazo de uso exclusivamente peonil.