Mercedes Martínez presenta a súa novela ‘¡Socorro! Un Angel me ha secuestrado’ na Pobra do Brollón
A Pobra do Brollón acollerá este venres, 13 de novembro, a presentación dunha nova novela escrita por unha veciña do concello. Trátase de Mercedes Martínez, coñecida como Merchiña, residente na parroquia de Pinel, que dará a coñecer a súa obra ‘¡Socorro! Un Angel me ha secuestrado’.
O acto terá lugar ás 20.00 horas na Casa da Cultura ‘Olga Novo’, da Pobra do Brollón, aberto a todas as persoas interesadas en coñecer de primeira man o traballo da autora.
A novela propón unha forma de aprender Historia de xeito divertido e accesible, dirixida especialmente ao público máis novo. A trama parte dun estudante de Educación Secundaria Obrigatoria (ESO) que é secuestrado por un anxo cunha misión: salvar á Humanidade. A partir de aí, o protagonista emprende unha viaxe xunto a este peculiar compañeiro que o leva a percorrer distintas etapas históricas, desde a Prehistoria ata a Idade Media, superando polo camiño diversas e inesperadas probas.