Iván Castiñeiras estará en Sarria no marco da mostra de cinema portugués Vendaval da Ribeira Sacra
A mostra de cinema portugués Vendaval volverá esta primavera á Ribeira Sacra cun novo pase que se desenvolverá entre o 23 e o 31 de maio, ofrecendo unha ampla programación cultural repartida por distintos puntos do territorio. Entre as propostas destacadas figura a participación do realizador Iván Castiñeiras, quen impartirá unha clase maxistral aberta ao público.
A masterclass terá lugar o sábado 23 de maio ás 19:00 horas n’A Palleira, en Manán (Sarria), cun custo de 15 euros e incluirá un petisco ao remate. Durante dúas horas, o cineasta afondará na súa traxectoria como realizador, abordando traballos como Deuses de Pedra (2025), así como a súa experiencia como director de fotografía en Galicia, Portugal e Francia. As persoas interesadas poden reservar praza no número 677 22 94 63.
Tras a sesión formativa, ás 22:00 horas, proxectarase de balde no mesmo espazo 'Deuses de pedra', nun pase que contará ademais cun coloquio posterior co propio autor.
Vendaval chega así ao seu último tramo da segunda edición, iniciada en agosto de 2025 e articulada en diferentes citas ao longo do ano. Este peche primaveral desenvolverase en varios concellos da Ribeira Sacra, concretamente en Sober, Bóveda, Sarria, Chantada e Monforte, cun programa que combina proxeccións cinematográficas, música en directo, encontros con creadores, catas de viño e actividades didácticas dirixidas a centros educativos.
Baixo o epígrafe Sobre Vendaval, a organización destaca que se trata dun espazo de divulgación do cinema portugués na Ribeira Sacra que busca servir como punto de encontro entre o audiovisual e a realidade dos dous lados da fronteira. A iniciativa pon o foco nas coproducións luso-galegas e nos vínculos artísticos e culturais entre ambos territorios, ao tempo que reivindica o cinema de autor no ámbito rural.
O pase de primavera inclúe a proxección de 'À procura da Estrela', de Carlos Martínez-Peñalver Mas, o domingo 24 de maio ás 18:00 horas no Centro Cultural de Sober; 'Ariel', de Lois Patiño, o sábado 30 de maio ás 22:00 horas no Cinema Palleiriso de Chantada; e 'Noite sem distância', tamén de Lois Patiño, o domingo 31 de maio ás 17:00 horas na Casa da Memoria de Xullán, en Bóveda.