Folgoso do Courel segue a tramitar as súas cinco liñas de axudas municipais para 2026

RibeiraSacraXa
As subvencións poden solicitarse ata o 23 de novembro
firma_recurso
Imaxe de arquivo ilustrativa
16 Nov 2026

O Concello de Folgoso do Courel segue a tramitar as cinco liñas de axudas municipais convocadas para este 2026, publicadas no Boletín Oficial da Provincia (BOP) de Lugo do pasado 20 de outubro. Quen aínda non presentase a súa solicitude pode facelo ata o 23 de novembro, data na que se pecha o prazo para as cinco convocatorias.

En total son cinco as liñas abertas, pensadas para distintas necesidades das familias do municipio. Por unha banda están as axudas destinadas a sufragar as festas parroquiais e as orientadas a fomentar a natalidade. Pola outra, mantéñense as dúas convocatorias de apoio para a compra de libros e material escolar: unha para o alumnado de Primaria e Secundaria do CPI Poeta Uxío Novoneyra, e outra específica para as familias con menores matriculados no segundo ciclo de Infantil do mesmo centro. Completa o paquete unha quinta liña pensada para o alumnado courelao que cursa estudos fóra do municipio, coa que se busca axudar a custear os desprazamentos derivados de formarse noutras localidades.

Dende o Concello insisten en que, antes de iniciar calquera trámite, convén revisar con calma os requisitos e a documentación de cada convocatoria, xa que as condicións cambian segundo o tipo de axuda solicitada. Tanto as bases reguladoras como os formularios de solicitude están dispoñibles na sede electrónica municipal.

0.15580582618713