Esperta Monforte pide estudar alternativas para reducir as expropiacións no proxecto da senda dos regatos
A formación local Esperta Monforte sinalou que a inquietude amosada polos veciños afectados polas expropiacións previstas no proxecto da senda dos regatos coincide coas obxeccións que o partido trasladou durante o pleno municipal, sesión na que votou en contra da iniciativa.
A agrupación precisa que a súa postura non supón un rexeitamento á creación de itinerarios peonís nin á recuperación dos cursos de auga, senón a un proxecto que, ao seu ver, mantén numerosos aspectos sen resolver.
No debate plenario, a formación puxo sobre a mesa as expropiacións previstas na contorna da rúa Doutor Fleming e o elevado custo de determinadas infraestruturas, entre elas unha pasarela sobre as vías do tren valorada en 700.000 euros máis IVE. Ademais, apuntou que, segundo as alternativas analizadas, entre o 46 % e o 52 % do orzamento se destinaba a obra de infraestrutura pesada.
O partido tamén expuxo dúbidas sobre a accesibilidade dalgunhas actuacións, o seu encaixe coa trama urbana existente, a necesidade de autorización de ADIF e a falta de detalle respecto a como se preservaría a vexetación actual.
Desde Esperta Monforte remarcan que xa advertiron no pleno de que o proxecto contiña numerosas incertezas, e que agora son os propios veciños os que están a poñer o foco nunha delas: as expropiacións que afectarían a vivendas e propiedades.
A formación pide ao goberno local que valore fórmulas alternativas capaces de reducir o impacto sobre os propietarios antes de seguir adiante coa tramitación das expropiacións. Insisten en que apoian a recuperación dos regatos e a mellora dos espazos para peóns, pero consideran que debe facerse evitando afeccións innecesarias, e reclaman que se estuden opcións que permitan executar a senda sen recorrer a expropiacións que xulgan evitables.