Comeza en Tabaoda a III edición do Ciclo Mestre Mateo
O Concello de Taboada pon en marcha unha nova edición do Ciclo Mestre Mateo, unha iniciativa que achega ao municipio as producións máis destacadas e premiadas da última gala do audiovisual galego.
A programación, impulsada pola Concellería de Cultura e Deporte do Concello de Taboada e financiada pola Área de Cultura da Vicepresidencia da Deputación de Lugo, desenvolverase entre o 17 de maio e o 18 de outubro no Cuartel Vello. Todas as sesións serán de acceso libre e gratuíto.
Ao longo destes meses proxectaranse diferentes obras do cinema galego recente, entre as que se inclúen títulos como “Antes de Nós”, “360 curvas”, “O silencio herdado”, “Ao son da nova regueifa”, “Sirat”, “San Simón” e “As liñas descontinuas”, ademais de varias seleccións de curtametraxes de animación e de imaxe real.
Desde o Concello destacan que esta iniciativa permite achegar ao público local “as pezas máis premiadas do audiovisual galego deste ano”, reforzando así a difusión da cultura cinematográfica feita en Galicia.
As proxeccións celebraranse nas datas previstas dentro do calendario do ciclo, consolidando o Cuartel Vello como espazo de referencia para a programación cultural no municipio.