Comeza a instalación do alumeado na Ronda Urbana e no paseo fluvial do Cabe
O Concello de Monforte de Lemos iniciou este martes as obras para dotar de iluminación pública varios espazos da cidade, entre eles a Ronda Urbana —no tramo comprendido entre a rotonda do Peregrino e a rúa Ourense— e un treito do paseo fluvial do río Cabe, na zona de Ramberde.
O alcalde, José Tomé Roca, supervisou o inicio dos traballos, acompañado pola tenente de alcalde, Gloria Prada, e o concelleiro de Obras, Medio Rural e Servizos, José Luis Losada.
As actuacións forman parte dun proxecto impulsado polo Concello e financiado a través do Plan de Sustentabilidade Turística do Consorcio da Ribeira Sacra, cun investimento total que supera os 270.000 euros.
En conxunto, está prevista a instalación de 76 luminarias: 47 na Ronda Urbana e 29 no paseo fluvial do Cabe. No caso da iluminación da Ronda Urbana, tratarase dunha vía de titularidade da Xunta de Galicia, inaugurada hai 19 anos e que ata o momento non contaba con alumeado público.
Segundo explicou o rexedor, a actuación responde a unha necesidade histórica da zona e foi posible grazas á decisión do equipo de goberno de destinar os fondos dispoñibles a esta intervención, que segundo indicou non fora executada por anteriores gobernos.
No relativo á distribución das luminarias, na Ronda Urbana instalaranse 47 puntos de luz sobre columnas troncocónicas galvanizadas de 9 metros de altura, cunha separación aproximada de 25 metros entre cada unha. Os traballos nesta zona comezaron este martes e prevese que queden finalizados ao longo da mesma semana.
No paseo fluvial do Cabe colocaranse 29 luminarias en columnas cilíndricas pintadas de 6 metros de altura, dispostas de forma unilateral e separadas aproximadamente 23 metros. Neste tramo, situado entre o Edificio Multiusos e a Ponte Medieval, as instalacións combinarán sistemas autónomos con enerxía solar e apoio eléctrico en caso necesario.
O proxecto prevé ademais que na Ronda Urbana se empreguen luminarias exclusivamente solares, reforzadas con paneis de maior capacidade de xeración enerxética.
O alcalde sinalou que estas intervencións permitirán mellorar a seguridade, a accesibilidade e o uso nocturno de dous espazos moi transitados, ao tempo que se avanza na eficiencia enerxética e na mellora das infraestruturas urbanas do municipio.