Chantada renova as pistas de tenis e suma un sistema de acceso con código QR
As instalacións deportivas do Parque Eloísa Rivadulla en Chantada foron obxecto dunha nova fase de melloras, nesta ocasión centrada nas pistas de tenis do municipio. Os traballos levouse a cabo dentro dunha liña de axudas autonómicas destinadas á creación, mellora e ampliación de servizos básicos a nivel local, unha partida que en anos anteriores se empregara para renovar parques infantís e que nesta ocasión se destinou a este espazo deportivo.
O proxecto contou cun orzamento de 51.462 euros, dos que o 70 % procede da subvención autonómica, mentres que a porcentaxe restante foi asumida polas arcas municipais.
Esta intervención vén completar un proceso que comezou en 2020, ano no que xa se acondicionaran dúas das tres canchas existentes. Agora, a terceira pista recibiu un novo pavimento, e ademais procedeuse ao repintado das superficies e de todas as liñas de xogo no conxunto das instalacións.
Entre as novidades destaca a incorporación dun sistema de acceso automatizado, que reproduce o modelo xa implantado nas pistas de pádel do municipio. Deste xeito, quen desexe utilizar as instalacións poderá reservar a súa quenda a través dunha aplicación móbil, que xerará un código QR no momento da reserva. Dito código será o que permita o acceso ás pistas. Este novo mecanismo entrará en funcionamento nas vindeiras datas.
As pistas de tenis de Chantada contan con tres canchas, vestiarios e iluminación artificial, o que permite a práctica deste deporte mesmo en ausencia de luz natural. O uso destas instalacións está vinculado ás escolas deportivas municipais, aínda que tamén permanecen abertas a clubs e a calquera persoa que solicite a súa utilización.