Chantada remata con ampla participación a súa programación de astroturismo baixo o selo Starlight
O Concello de Chantada desenvolveu ao longo deste ano, a través da Oficina Municipal de Turismo, unha ampla programación de actividades destinada a dar a coñecer o potencial da localidade como Municipio Starlight. A iniciativa reuniu seis propostas de acceso gratuíto que rexistraron unha notable afluencia de público.
Entre as actividades incluíuse un obradoiro práctico de iniciación á astronomía pensado para empresarios e emprendedores do sector turístico, varias xornadas guiadas de observación do ceo nocturno, unha charla divulgativa sobre a recente eclipse solar e un curso de astrofotografía, co que se puxo o peche ao programa.
O alcalde, Manuel Lorenzo Varela, salientou a boa resposta obtida por esta programación, que ao seu xuízo pon de manifesto o valor de divulgar este tipo de recursos turísticos. Segundo explicou, as actividades atraeron tanto a veciños do municipio como a visitantes que aproveitaron a súa estancia en Chantada para participar, ademais de persoas que se desprazaron expresamente atraídas pola afección á astronomía. O rexedor destacou que as prazas ofertadas se cubriron na súa totalidade, o que ao seu entender evidencia o interese espertado polo ceo nocturno do municipio e polas posibilidades que ofrece.
O ciclo arrincou co obradoiro dirixido a profesionais do turismo, concibido para achegarlles nocións básicas de astronomía e animalos a incorporar este recurso nas experiencias que ofrecen aos seus visitantes.
Especial acollida tivo o curso de astrofotografía, celebrado o pasado 4 de setembro como peche do programa, no que os participantes puideron coñecer as principais técnicas e ferramentas para fotografar o ceo nocturno, así como as posibilidades que ofrece Chantada para esta disciplina.
A Oficina Municipal de Turismo realiza enquisas de valoración entre as persoas participantes nestas iniciativas, cuxos resultados reflicten unha boa acollida das actividades e un notable interese pola astronomía e polo coñecemento do ceo nocturno.
O alcalde concluíu que estes resultados reforzan a aposta de Chantada polo astroturismo como recurso complementario, capaz de diversificar a oferta do municipio, atraer novos públicos e poñer en valor as condicións do territorio para a observación do ceo nocturno.
Outras actividades culturais en Chantada
A Casa da Cultura de Chantada acolle ata o día 3 deste mes unha mostra fotográfica dedicada ao Mosteiro de Oseira, coa mirada particular de 18 autores da Asociación Fotográfica O Potiños.
Así mesmo, durante todo este mes permanece aberto na Casa da Cultura o prazo de inscrición para quen desexe asistir a unha nova representación do Centro Dramático Galego. O 3 de outubro, ás 18.00 horas, representarase no Salón Teatro de Santiago de Compostela a obra 'A gaivota', en formato de ensaio aberto.
O programa de mobilidade do Centro Dramático Galego, 'Subes ao autobús do teatro?', pon a disposición do público un autobús que sairá da Praza de Galicia ás 15.10 horas, cunha redución no prezo da entrada ata os 5 euros. As prazas son limitadas, polo que é necesario inscribirse antes do 30 de setembro, acudindo á Casa da Cultura de Chantada ou chamando ao teléfono 982 441 752.