Chantada recupera a rúa Serra do Faro tras as obras de reparación dos danos do temporal invernal
A rúa Serra do Faro de Chantada, situada na contorna das piscinas municipais, volveu abrirse ao tráfico tras rematar os traballos de reparación derivados dos danos ocasionados polo temporal do pasado inverno. As fortes riadas rexistradas daquela provocaron o derrubamento de parte do terreo no Paseo Fluvial e o colapso de varias canalizacións que discorrían baixo a calzada, entre elas a correspondente ao regato de Zaquín.
Tras detectarse a magnitude do problema, o Concello trasladou de inmediato a situación á Confederación Hidrográfica Miño-Sil (CHMS), organismo co que se iniciou en abril un proxecto de reparación desenvolvido de xeito conxunto entre ambas as administracións.
O alcalde de Chantada, Manuel Lorenzo Varela, explicou que nun primeiro momento non se coñecía o alcance real dos danos baixo a vía, polo que a CHMS abordou a actuación como unha obra de emerxencia. Segundo relata o rexedor, dende ese intre a concellaría de Infraestruturas traballou xunto cos técnicos do organismo para ir acondicionando a zona a medida que se avaliaban os desperfectos. O propio alcalde sinalou que o proxecto se foi ampliando e perfeccionando co obxectivo de deixar a zona mellor preparada fronte a posibles inundacións futuras, subliñando que se realizou un importante traballo baixo terra. Así mesmo, agradeceu a implicación do presidente da CHMS, José Antonio Quiroga, e do equipo técnico do organismo, destacando o compromiso amosado co municipio e a disposición a atender as peticións do Concello.
A actuación supuxo un investimento superior aos 500.000 euros, dos que 460.000 euros foron achegados pola CHMS e 50.000 euros polo Concello de Chantada. Con este orzamento renováronse por completo as canalizacións interiores da zona —pluviais, fecais e as correspondentes ao regato de Zaquín— e instaláronse as dotacións necesarias para que futuras edificacións próximas poidan conectarse á rede de saneamento.
Entre as melloras executadas tamén se inclúen novos muros de contención e a renovación do paseo, que agora conta cunha varanda nova. Ademais, a rúa Serra do Faro puido ampliarse grazas á cesión gratuíta de terreo por parte dos propietarios das fincas colindantes. A vía complétase cunha nova rotonda situada ao final da rúa, pensada para facilitar a circulación.
No referente ao firme, empregouse aglomerado en quente, e habilitáronse novas beirarrúas xunto cunha reorganización das zonas de aparcamento, que incorpora 15 novas prazas en batería. Tamén se renovou o alumeado público para dar continuidade á iluminación existente e completouse toda a sinalización da zona. Por último, pintouse unha senda peonil pegada ao muro que conecta o Paseo Fluvial coa entrada das piscinas municipais, co fin de facilitar o paso dos peóns.