Chantada proxecta 'Decorado', de Alberto Vázquez, no cine de verán ao aire libre da Praza do Cantón
O Concello de Chantada continúa coa súa programación de Verán Cultural 2026 cunha nova sesión de cine ao aire libre. Este venres 14 de agosto, ás 22.00 horas, a Praza do Cantón acollerá a proxección de 'Decorado', con entrada de balde para todas as persoas asistentes.
A película, dirixida por Alberto Vázquez, é unha produción española de animación estreada en 2025, cunha duración de 89 minutos. O guión corre a cargo do propio Vázquez xunto con Francesc Xavier Manuel Ruiz, mentres que a música é obra de Joseba Beristain e a fotografía de animación de Martín Romero.
Encadrada dentro dos xéneros de animación, fantástico e drama, 'Decorado' aborda temas como o drama psicolóxico, a comedia negra, a distopía e a animación para adultos. O filme está baseado na aclamada curtametraxe homónima que o propio Alberto Vázquez realizou en 2016.
A sinopse narra a historia de Arnold, un rato de mediana idade atrapado nunha crise existencial: o seu matrimonio esfarélase, a súa vida resúltalle absurda e comeza a sospeitar que todo o que o rodea é unha gran farsa. Cando o seu mellor amigo morre en circunstancias sospeitosas, Arnold convéncese de que algo non encaixa, e o que comeza como unha paranoia cotiá transfórmase nunha fuxida desesperada cara a algo parecido á liberdade.
A cita enmárcase no ciclo de cine ao aire libre que forma parte do programa de Verán Cultural 2026 na localidade.