Bóveda abre o seu ciclo de teatro de outono cunha función familiar en horario escolar
O Concello de Bóveda pon en marcha mañá a súa programación cultural de outono cunha obra de teatro dirixida ao público familiar. A cita será o martes 22 de setembro, ás 11.00 horas, no Centro Sociocultural de Bóveda.
A encargada de abrir o ciclo será a compañía Alentía Teatro, que presentará o espectáculo 'Tesouros da man aberta'. Trátase da primeira proposta do ciclo de teatro de outono, unha iniciativa que o consistorio organiza todos os anos.
Nesta ocasión, a función terá lugar en horario escolar. Deste xeito, búscase facilitar a asistencia do alumnado do CEIP, así como das persoas usuarias da residencia e das casas do maior do municipio.
A representación está aberta, ademais, a calquera persoa que queira acudir, polo que veciños e veciñas de todas as idades poderán gozar dunha proposta pensada para compartir en familia.