'Artur Ui, o ovo da serpe' chega este xoves ao Edificio Multiusos de Monforte de Lemos
O Edificio Multiusos de Monforte de Lemos recibe este xoves, 22 de outubro, ás 20.15 horas, unha nova representación dentro do ciclo teatral de outono. Nesta ocasión será a quenda de 'Artur Ui, o ovo da serpe', posta en escena pola compañía galega Talía Teatro.
A función forma parte da programación cultural que o Concello de Monforte desenvolve a través da Rede Galega de Teatros e Auditorios de AGADIC, da que o municipio forma parte, xunto cos Circuítos de Teatro Profesional e Afeccionado impulsados pola Deputación de Lugo. Esta colaboración permite ofrecer á veciñanza unha variada oferta escénica ao longo do último trimestre do ano.
Trátase dunha peza pensada para público adulto, cuxa entrada ten un custo de 5 euros, cunha tarifa reducida de 3 euros para estudantes, persoas desempregadas e xubiladas.
A obra está asinada orixinalmente por Bertolt Brecht, con adaptación de Quico Cadaval e Diego Rey, e dirección do propio Cadaval. Sobre o escenario estarán Toño Casais, Marta Lado, Dani Trillo, María Ordóñez, Marta Ríos, Diego Rey, Xurxo Barcala e Artur Trillo.
A proposta retoma o estilo do teatro épico para analizar, con ton crítico e irónico, a realidade actual. Máis alá de recuperar un clásico do século XX, a produción afonda en como funcionan os engrenaxes do poder e na natureza do autoritarismo, trazando un paralelismo co presente, marcado polo rexurdir de discursos e movementos de corte fascista.
Esta cita enmárcase nunha programación teatral máis ampla que se estenderá ata decembro, cun total de 12 espectáculos entre outubro e decembro, combinando compañías profesionais e grupos de teatro afeccionado, tanto no Edificio Multiusos como na Casa da Cultura. Entre as próximas propostas figuran '#Influencers', de Negro López (29 de outubro); 'Os dous de sempre', de Mofa e Befa (5 de novembro); 'A Rateira', do grupo Argalleiras Teatro (6 de novembro, entrada gratuíta); 'A Metamorfoso', de Sarabela Teatro (12 de novembro); e outras citas con entrada gratuíta como 'Vermello', de Rebuldeira Teatro-Sarria, ou 'A Revolución, 1789... ou por aí', de Teatreiras Monforte.
Con esta oferta, o Concello busca manter vivo o acceso da cidadanía ás artes escénicas e seguir impulsando a difusión do teatro galego entre distintos públicos.