A Ribeira Sacra contará con novos pantaláns públicos e melloras nas infraestruturas de atraque
A Confederación Hidrográfica do Miño-Sil (CHMS) deu un novo paso na implantación do Plan de Ordenación da Navegación e o Atraque na Ribeira Sacra (PONARS) coa sinatura de protocolos de colaboración cos concellos de Carballedo, Chantada, Pantón e O Saviñao. O obxectivo é mellorar a rede de pantaláns públicos e avanzar nun modelo de navegación máis ordenado e compatible coa protección ambiental deste espazo.
O presidente da CHMS, José Antonio Quiroga, explicou que o incremento da actividade turística na Ribeira Sacra nos últimos anos provocou unha maior presión sobre os ríos Miño e Sil, especialmente pola demanda de actividades náuticas. Ante esta realidade, o PONARS establece un marco para compatibilizar o uso recreativo das augas coa conservación da paisaxe e dos ecosistemas fluviais.
As actuacións previstas varían en función das necesidades de cada municipio. En Carballedo construirase un novo pantalán na parroquia de San Xoán da Cova, nas proximidades da igrexa, respectando en todo momento a protección do patrimonio existente na contorna.
En Chantada acometerase a reparación do pantalán situado en Pincelo. Os traballos incluirán a rehabilitación da plataforma principal, da plataforma intermedia e da rampla de acceso. Unha vez rematada a intervención, a infraestrutura será cedida ao Concello, que asumirá a súa xestión, conservación e mantemento.
No municipio do Saviñao instalarase un novo pantalán na praia fluvial da Cova, cunha capacidade inicial para entre oito e dez embarcacións de pequeno tamaño. Ademais, o proxecto prevé a posibilidade de ampliar no futuro a infraestrutura para facilitar tamén o embarque de pedaletas, kaiaks e outros medios recreativos similares.
No caso de Pantón, actuarase sobre o pantalán municipal de Maiorga, na parroquia de Vilar de Ortelle. A intervención consistirá na súa reparación e ampliación, incorporando ademais un sistema de control de acceso. Coas obras incrementarase a capacidade ata entre oito e dez prazas de amarre e, unha vez finalizadas, a infraestrutura continuará destinada ao uso público baixo a xestión municipal.
Segundo explicou Quiroga, o PONARS establece criterios para autorizar novos pantaláns, dando prioridade ás instalacións de titularidade pública. Neste proceso, destacou a importancia da colaboración cos concellos, xa que son as administracións que mellor coñecen as necesidades do territorio e poden contribuír a un desenvolvemento turístico máis ordenado e sostible.
O presidente da Confederación avanzou tamén que esta iniciativa terá continuidade coa sinatura dun futuro convenio coa Deputación de Lugo para ampliar os pantaláns existentes nos Peares e en Belesar, reforzando así a rede de infraestruturas fluviais da Ribeira Sacra.