A Pobra do Brollón renova o material deportivo para reforzar a actividade física no municipio
O Concello da Pobra do Brollón incorporou novo material deportivo grazas ao convenio asinado coa Área de Deportes da Vicepresidencia da Deputación de Lugo. A adquisición permitirá ampliar e renovar o equipamento empregado nas diferentes actividades deportivas que se desenvolven no municipio.
O material estará destinado ás propostas organizadas pola Concellería de Deportes, entre elas as clases de ximnasia, ioga e zumba, e tamén poderá utilizarse nas colaboracións co C.D. Brollón e con outras entidades deportivas da localidade.
Con esta actuación, o Concello reafirma a súa aposta pola promoción do deporte e da actividade física entre o conxunto da veciñanza, con propostas dirixidas a persoas de todas as idades, desde a cativada ata a terceira idade.