A curtametraxe ‘Descensos’ pecha a súa xira por centros educativos con sesións en institutos de Chantada e Monforte de Lemos
A curtametraxe ‘Descensos’ puxo hoxe o punto final ao seu ciclo de presentacións en centros educativos da provincia de Lugo, con dúas sesións que tiveron como escenario o IES Lamas das Quendas, en Chantada, e o IES Daviña Rei, en Monforte de Lemos.
A obra combina documental e ficción para narrar a aventura vivida en 1982 por un grupo de mozos e mozas que descenderon os ríos Miño e Sil a bordo de lanchas salvavidas de fabricación soviética, atopadas no seu día nun desguace de Vigo.
Para reconstruír aquela experiencia, a peza recorre a materiais de arquivo da época —fotografías analóxicas e filmacións en Super 8— que se combinan cos testemuños actuais dalgúns dos mozos e mozas que participaron naqueles descensos. A isto súmase a voz dun diario ficcionado que entrelaza a viaxe polos ríos cun retrato dos anos da Transición en Galicia e co rexurdir da música tradicional daquela etapa.
As proxeccións nos institutos non se limitaron á exhibición da cinta: a actividade completouse con obradoiros dedicados aos formatos audiovisuais analóxicos, nos que o alumnado puido coñecer de preto cámaras, películas, cintas e outros aparellos da época, achegándose así de forma práctica á historia da técnica audiovisual.