A comarca de Ourense concentra máis dun terzo do tráfico que circula polas estradas provinciais
A comarca de Ourense, que representa o 16 % do total da rede provincial de estradas, absorbe máis dun terzo de toda a circulación que transita polas vías provinciais. Así o reflicte o Plan de Aforos 2025, un estudo que ofrece un retrato detallado do fluxo de tráfico en toda a provincia.
A análise confirma unha forte concentración de vehículos arredor da capital ourensá. A vía con maior intensidade de tráfico é o acceso principal ao polígono industrial de San Cibrao das Viñas (OU-0514), que roza os 18.000 vehículos diarios. Séguea de preto a estrada que une Ourense con A Merca (OU-0517), con máis de 13.500 pasos ao día.
Fóra da área metropolitana, destaca a vía que conecta Xinzo con Vilar de Barrio (OU-1117), que supera os 8.000 vehículos diarios no seu tramo inicial. Este volume de tráfico fai que esta estrada cumpra os requisitos para integrarse na rede prioritaria do Ministerio de Transportes e Mobilidade Sustentable.
O papel do medio rural
Máis alá da zona urbana, o estudo pon de relevo a importancia da rede provincial para manter conectado o territorio rural. Máis da metade dos quilómetros de estradas provinciais rexistran un tránsito medio duns 250 vehículos diarios, un servizo que resulta clave para a poboación que vive en zonas dispersas.
O informe clasifica as comarcas en tres niveis segundo a súa intensidade de tráfico:
- Intensidade alta (máis de 600 vehículos diarios de media): a comarca de Ourense, que ronda os 1.000 vehículos ao día, seguida de Allariz-Maceda e A Limia, esta última a segunda en volume total de tráfico.
- Intensidade media (entre 250 e 500 vehículos diarios): O Ribeiro, Terra de Celanova, Verín, A Baixa Limia e Valdeorras.
- Intensidade baixa (arredor de 200 vehículos ou menos): Terra de Caldelas, O Carballiño —coa segunda rede máis extensa, aínda que moi repartida— e Terra de Trives. Pecha a lista Viana, con pouco máis de 130 vehículos diarios.
En canto ao transporte pesado, as comarcas con maior presenza son A Limia, Ourense e Valdeorras, vinculadas respectivamente ao sector agroindustrial, á actividade industrial da capital e á explotación da lousa.
O venres, o día de maior tráfico
O estudo tamén analiza os patróns de mobilidade ao longo da semana. O venres confírmase como a xornada con maior circulación, mentres que os domingos o tráfico descende preto dun terzo respecto á media habitual. Unha excepción é a estrada de acceso a Cabeza de Manzaneda, onde os sábados a intensidade de tráfico practicamente se duplica debido ao seu atractivo turístico e de lecer.
Os datos recollidos remitiranse ao Ministerio de Transportes e Mobilidade Sustentable para a súa incorporación ao Anuario Estatístico e ao Mapa de Tráfico estatal. Para a Deputación de Ourense, o documento constitúe unha ferramenta técnica esencial para planificar a conservación das vías, optimizar os investimentos e deseñar novas actuacións en seguridade viaria.
300 millóns de quilómetros percorridos
Durante o último ano, os vehículos que circularon polas estradas da Deputación de Ourense percorreron en conxunto preto de 300 millóns de quilómetros, cunha media aproximada de 450 vehículos diarios por cada punto da rede provincial.
O traballo, realizado polo equipo de aforos e seguridade viaria da Área de Infraestruturas —formado por catro aforadores e un xefe de equipo—, mediu a circulación en 327 puntos de control repartidos por toda a provincia. Grazas a esta cobertura, o 95,7 % dos 1.848 quilómetros que suman as 266 estradas provinciais conta xa con datos medidos de forma directa, unha cifra que mellora o 94,3 % rexistrado en 2023. Ademais, a rede conta con 12 estacións permanentes que contabilizan o paso de vehículos os 365 días do ano.