A CHMS inicia os traballos de reparación dos danos causados polos temporais de xaneiro no paseo fluvial do río Asma
A Confederación Hidrográfica do Miño-Sil (CHMS) está a investir máis de 470.000 euros na reparación dos danos ocasionados polos temporais do pasado mes de xaneiro no paseo fluvial do río Asma ao seu paso por Chantada.
O presidente do organismo, José Antonio Quiroga, supervisou este martes o desenvolvemento das obras, que teñen como obxectivo recuperar a seguridade e o uso público desta zona, especialmente afectada na contorna das piscinas municipais.
Os temporais rexistrados na última semana de xaneiro provocaron importantes danos tanto na estrutura do paseo como nos servizos públicos situados baixo o mesmo, entre eles a rede de saneamento. Esta situación obrigou ao peche da área debido ao risco derivado da inestabilidade do terreo.
Ante esta problemática, as actuacións foron declaradas de emerxencia e contemplan a renovación das infraestruturas danadas, a reparación do encauzamento do río e a reposición do treito afectado do paseo. “As actuacións consisten na renovación dos servizos públicos afectados, entre eles a rede de saneamento, na reconstrución e mellora dos muros do encauzamento do río e na reposición do treito de paseo danado”, explicou o presidente.
Os traballos, que comezaron o pasado 8 de abril, están a ser executados pola empresa DESMACO S.L. e prevese que se prolonguen ata mediados do verán. Na actualidade, estanse a levar a cabo as escavacións necesarias na zona afectada como paso previo á reparación dos danos.