Veciñanza Fronte o Odio reúne en Monforte a un cento de persoas na súa charla sobre discursos de odio
O Centro Cívico de Monforte de Lemos acolleu este xoves unha charla sobre discursos de odio que, segundo os datos facilitados pola organización, congregou a preto de cen persoas interesadas en reflexionar sobre este fenómeno e os seus efectos na convivencia social.
A actividade estivo a cargo de Adrián Gómez Martínez, mestre de Educación Primaria volcado na loita contra a discriminación, e David López, licenciado en Dereito e Ciencias Políticas pola Universidade Carlos III de Madrid e membro da Corrente Revolucionaria de Traballadores (CRT).
Ao longo do encontro repasáronse os mecanismos empregados para construír e propagar os discursos de odio, o seu encaixe dentro da lexislación vixente e as repercusións que xeran, con especial incidencia nos colectivos máis expostos a sufrir discriminación. Apoiándose en casos recentes, os relatores incidiron na necesidade de saber recoñecer este tipo de mensaxes e de contar con recursos prácticos para contrarrestalos.
Desde Veciñanza Fronte o Odio subliñan que a boa resposta de público reflicte unha inquietude social crecente fronte á normalización de actitudes discriminatorias e intolerantes, ao tempo que evidencia o interese da cidadanía por dispor de espazos onde debater e reflexionar sobre estas cuestións.
O colectivo lembra que se define como un proxecto aberto, plural e independente de calquera formación política, integrado por persoas de sensibilidades distintas unidas pola defensa dos dereitos humanos, o feminismo, o antirracismo, o respecto á diversidade sexual e o ecoloxismo.
A organización agradeceu a implicación dos veciños e avanzou o seu propósito de seguir impulsando iniciativas de sensibilización e debate no futuro. Neste sentido, sinalaron: "Esta é só a primeira de moitas iniciativas. Queremos seguir sumando persoas, ideas e propostas para construír entre todas e todos unha sociedade máis xusta, diversa e libre de odio".