Taboada acolle este sábado a Copa Deputación de Técnica de taekwondo
O Concello de Taboada convértese este sábado en punto de encontro do taekwondo da provincia de Lugo coa celebración da Copa Deputación de Técnica, unha competición que terá lugar no pavillón polideportivo local ao longo da xornada da mañá.
A proba contempla dúas categorías, infantil e adultos, e contará entre os seus participantes con varios deportistas do propio concello, que competirán diante do seu público.
A iniciativa é posible grazas á colaboración entre a Vicepresidencia da Deputación de Lugo, responsable da área de Deportes, e a Área de Cultura e Deporte do Concello de Taboada, entidades que impulsan conxuntamente este tipo de eventos deportivos na comarca.
Dende a organización animouse aos veciños a se achegar ao pavillón para seguir en directo esta cita, que permitirá gozar das evolucións técnicas dos participantes nas distintas categorías de idade.