Sernande mantén viva a tradición do Espírito Santo cunha celebración marcada pola memoria e as raíces do pobo
A parroquia de Sernande celebrou o pasado domingo 24 de maio a tradicional festa do Espírito Santo cunha misa e posterior procesión que volveron reunir a numerosos veciños e persoas chegadas doutros puntos da contorna. Trátase dunha das citas máis significativas para o pobo, unha celebración que cada ano serve para reforzar os lazos entre os habitantes da zona e manter viva a memoria colectiva da antiga aldea.
A festividade ten ademais un importante valor simbólico para os veciños, xa que a antiga capela atopábase no chamado Sernande Vello, antes da chegada do encoro. Coa construción da infraestrutura hidráulica, a igrexa desapareceu e foi levantada unha nova capela na zona coñecida como “O Cimbro”, onde actualmente se celebra esta única misa anual.
O enclave converteuse co paso do tempo nun lugar moi especial para os asistentes, tanto polo seu significado emocional como pola paisaxe que o rodea. Desde este punto pódense contemplar unhas vistas privilexiadas da illa de Sernande, un espazo que continúa moi presente na memoria dos veciños da parroquia.
Unha das participantes na celebración destacou a importancia de manter viva esta tradición “para que se recorde que non nos esquecemos das nosas raíces”, nunha xornada marcada pola convivencia, o reencontro entre familias e a lembranza da historia do pobo.