Semente Ribeira Sacra organiza unha mesa redonda en Monforte baixo o título “Oportunidades de negocio no rural”
O Centro do Viño da Ribeira Sacra acollerá este luns, 29 de xuño, a partir das 19.30 horas, unha mesa redonda baixo o título “Oportunidades de negocio no rural”. A actividade está promovida pola Asociación Semente de Monforte e estará aberta ao público en xeral, cun especial chamamento a empresas e persoas emprendedoras interesadas en coñecer as posibilidades que ofrece o territorio para desenvolver iniciativas empresariais.
A xornada servirá tamén como acto de peche do Bono de Asesoramento, unha iniciativa da que este ano se beneficiaron os proxectos finalistas da XI edición do Concurso de Proxectos Empresariais Semente Ribeira Sacra grazas á colaboración da Axencia Galega de Desenvolvemento Rural (AGADER).
Na mesa redonda participarán diferentes representantes institucionais, empresariais e persoas vinculadas ao emprendemento. Entre os relatores estarán Mª Paz Rodríguez, directora xeral de AGADER; Jesús Díaz, de Ensácrate, recoñecido no Concurso Semente Ribeira Sacra; José Pino, de LamasDulce, tamén premiado no certame; Xosé Lois Lamazares, de Galletas Daveiga; María Xosé Senra, de Pensos Senra; e Javier Germande, de Eosa, empresa encargada de impartir o Bono de Asesoramento.
A través deste programa de acompañamento buscouse reforzar a viabilidade e a sustentabilidade das propostas finalistas mediante apoio especializado e asesoramento técnico. O encontro deste luns pretende ademais converterse nun espazo para compartir experiencias e abordar novas fórmulas e solucións ante os desafíos que supón emprender no ámbito rural.