Segredos de Pantón organiza unha ruta guiada para buscar cogomelos entre carballeiras tras as choivas do outono
A Asociación Cultural Segredos de Pantón organiza unha saída micolóxica para o vindeiro domingo 22 de novembro, aproveitando que as últimas choivas caídas no Concello favoreceron a aparición de cogomelos entre restos de madeira, follas e outra materia orgánica propia desta época do ano.
A actividade consistirá nun percorrido polas carballeiras e devesas da zona co obxectivo de localizar e identificar diferentes especies de cogomelos, ademais de coñecer máis sobre as súas características. A iniciativa estará dirixida por Urbano, veciño de Guítara, con experiencia na materia.
A cita será ás 10.00 horas na praza de Goián, en Santa María de Ferreira. O número de prazas é limitado, cun total de 30, que se cubrirán por rigorosa orde de inscrición.
Participar na saída ten un custo de 2 euros por persoa, que deberá aboarse por adiantado para formalizar a inscrición. A organización advertiu de que, en caso de non poder asistir finalmente, este importe non será devolto.
Entre o material recomendado para os participantes figura roupa cómoda e impermeable, así como navalla e cesta para a recollida de exemplares.
As persoas interesadas poden inscribirse a través do teléfono 673 221 241 (Manuel) ou 662 669 223 (Lucas), por correo electrónico a segredosdepanton@gmail.com, ou mediante as redes sociais da asociación en Instagram e Facebook.