Sarria e Chantada acollen esta semana dous obradoiros para combater a desinformación
Os obradoiros contra a desinformación impulsados polo Colexio Profesional de Xornalistas de Galicia coa subvención da Deputación de Lugo continúan esta semana no sur da provincia con dúas novas citas en Sarria e Chantada. As actividades buscan achegar á cidadanía ferramentas para identificar as noticias falsas, distinguir o xornalismo de calidade e combater a difusión de información enganosa.
O primeiro taller terá lugar este xoves 12 de novembro, ás 19:00 horas, na Casa da Cultura de Sarria, situada na rúa Marqués de Ugena. Estará impartido polo xornalista Miguel Rodríguez Fernández.
A segunda convocatoria será o sábado 14 de novembro, ás 12:00 horas, na Aula CeMIT de Chantada, situada na rúa da Ribeira Sacra, número 12. A xornalista, realizadora audiovisual e tradutora Elena Martín Lores será a encargada de impartir esta sesión.
Ambos os obradoiros están orientados a proporcionar estratexias para recoñecer a información veraz e implicar a cidadanía na loita contra as noticias falsas e os prexuízos que provocan na sociedade. As actividades son de asistencia libre e gratuíta, sen necesidade de inscrición previa.
Os dous profesionais, ao igual que o resto de persoas formadoras do programa, recibiron formación específica en alfabetización mediática para trasladar á poboación ferramentas eficaces coas que identificar e combater a desinformación.