Ribas de Sil súmase ao programa 'Lugo de corazón a corazón' de formación en reanimación cardiopulmonar
Ribas de Sil forma parte da listaxe de 16 concellos da provincia de Lugo que van acoller o programa 'Lugo de corazón a corazón', unha iniciativa posta en marcha pola Asociación Lucense de Cardioloxía (ACARLU) e que conta co respaldo da Deputación de Lugo, institución que destina 8.217,50 euros ao desenvolvemento conxunto do proxecto.
A actividade formativa estenderase entre este mes de outubro e a vindeira primavera, e abranguerá distintos bloques temáticos: prevención de problemas cardiovasculares, promoción de hábitos de vida saudables, nocións básicas de primeiros auxilios e, como eixo central, a aprendizaxe práctica de técnicas de reanimación cardiopulmonar e do uso de desfibriladores externos automáticos.
Para Ribas de Sil, sumarse a esta iniciativa supón poder ofrecer aos seus veciños, así como aos habitantes do resto do Xeoparque Montañas do Courel, unha oportunidade de capacitación en técnicas que resultan determinantes ante unha emerxencia cardíaca.
Desde o Concello insístese en que os primeiros minutos tras sufrir unha parada cardíaca son decisivos: agardar varios minutos ata que chegue asistencia sanitaria especializada sen ter iniciado as manobras de reanimación pode supor unha demora excesiva. De aí a importancia de que o maior número posible de persoas coñeza como realizar unha reanimación cardiopulmonar e manexar un desfibrilador, unhas técnicas que non require formación sanitaria previa para poder aplicarse.
O Concello trasladou o seu agradecemento tanto á Deputación de Lugo coma a ACARLU por esta iniciativa, que consideran especialmente relevante no ámbito rural. Nestas zonas, a distancia ata os servizos de emerxencias pode facer que a actuación inmediata das persoas presentes no lugar resulte aínda máis determinante para a supervivencia do afectado.
O Concello de Ribas de Sil anunciou que, en canto se fixe a data concreta na que se impartirá esta formación no municipio, informarase á poboación para facilitar a súa participación.