Ribas de Sil pecha os Encontros coa Rapazada do Verán Cultural cun obradoiro de pasatempos
O programa Verán Cultural de Ribas de Sil celebrará este venres, 28 de agosto, o último dos tres Encontros coa Rapazada previstos para este verán, antes do inicio do novo curso escolar.
Nesta ocasión, a escritora Celia Díaz Núñez será a encargada de conducir un obradoiro no que os nenos e nenas participantes poderán achegarse á construción de pasatempos a través do enxeño, as palabras e a creatividade.
A actividade desenvolverase entre as 11.00 e as 13.00 horas na Aula de Pesca de San Clodio e está aberta á participación de todos os nenos e nenas a partir dos 8 anos.
O encontro servirá para poñer o broche final a un programa que ao longo do verán combinou propostas relacionadas coa astronomía e a robótica, achegando aos máis novos diferentes ámbitos de coñecemento dun xeito práctico, participativo e ameno.