Raquel Arias substituirá a Elena Candia na vicepresidencia do Parlamento galego
O Grupo Popular levará ao pleno do Parlamento de Galicia a candidatura de Raquel Arias para ocupar a vicepresidencia da Cámara autonómica, posto que quedou vacante tras a saída de Elena Candia da Mesa do Parlamento ao asumir a Alcaldía de Lugo despois da moción de censura aprobada a pasada semana.
Segundo confirmaron fontes populares, a formación aposta pola deputada lucense pola súa traxectoria política e a súa experiencia institucional acumulada ao longo de máis dunha década na Cámara galega. Arias xa formou parte anteriormente da Mesa do Parlamento, onde exerceu como secretaria, ademais de desempeñar responsabilidades como viceportavoz do Grupo Popular e portavoz en distintas áreas.
A votación para formalizar o seu nomeamento celebrarase este martes durante a sesión plenaria. Se recibe o apoio necesario, integrarase no órgano reitor do Parlamento xunto ao presidente Miguel Santalices, a vicepresidenta segunda Montse Prado, o secretario Julio García Comesaña e a vicesecretaria Patricia Iglesias.
Ao longo da súa carreira política, Raquel Arias foi tamén delegada territorial da Xunta en Lugo, deputada no Congreso e alcaldesa de Sober. Ademais, mantivo no pasado unha disputa interna con Elena Candia pola presidencia provincial do partido en Lugo.
A incorporación de Arias prodúcese despois da renuncia automática de Candia aos seus cargos parlamentarios ao converterse en alcaldesa de Lugo, debido á incompatibilidade entre ambas responsabilidades. Este cambio tamén supón a entrada no Parlamento de José Luis Novo Teijeiro, extenente de alcalde de Rábade, que ocupará o escano vacante deixado pola dirixente popular.